الفنانون يتقاضون ملايين والمعلمون يعانون ومظاهرات الدول العربية من أجل فلسطين أختفت ؟ .. أبرز تصريحات محمد صبحي
المبالغة في أجور الفنانين .. قال الفنان محمد صبحي: "لما قلت إني ما أقبلش كفنان إن الفنان ياخد 40 و50 مليون والمعلم بياخد أقل من 2000 جنيه، مش معناه إني مستكتر على حد الملايين لأ والله بس أنا ببص على معلم في ظروف ما يقدرش يعيش فيها براتب أقل من 10 آلاف جنيه فالمفروض إن الفنان لا يبالغ في أجره وهو يقدم فنًّا هابطًا".
رفض محمد صبحي المشاركة في المسلسلات
وأوضح محمد صبحي خلال لقائه ببرنامج "نظرة" الذي يقدمه الإعلامي حمدي رزق بقناة "صدى البلد": "أنا كمحمد صبحي بشتغل بفلوسي مش بعمل مسلسلات في القنوات لأن قد تكون مش مستحبة ولكن بشتغل بفلوسي في المسرح".
محمد صبحي يكشف مفاجأة صادمة عن شباك تذاكر السينما
وتابع: "مين اللي قال إن الفنان بيطلب أجر على قد موهبته دلوقتِ ولا شباك التذاكر بتاعه، اللي بيقطع تذاكر دلوقتِ وبيملأ السينمات لو ما كانش شيء تافه مش هيخشه ودي أرقام".
تدهور مستوى الفن في مصر
وأكمل: "الفن جزء أصيل فيه الترفيه ولكن ترفيه منزوع منه الفكر والرسالة مش هيفيد بحاجة، شغل أعمال أنا عملتها واقفل الصورة واسمع بس الصوت هتلاقي ناس بتصرخ، بتكلم عن قضية أمريكا في ماما أمريكا، بتكلم عن وجهة نظر عن قضية سياسية عليا في تخاريف وكارمن وسكة السلامة".
تدهور الفن وتأثيره على المشاهدين
وانفعل محمد صبحي بسبب حال الفن وقال: "فيه ناس تقول لك أصل الفن ترفيه وتفاهة وكفاية المتعة أن المشاهد بيضحك لأ المشاهد ما بيضحكش، وعيب لما تقول إن قدراتك كلها علشان تضحك تبقى قليل الأدب لأ أنت تضحك بمستوى أنت طالب تحققه في مجتمعك، وكل المفكرين اللي عملوا أعمال زي نجيب محفوظ وإحسان عبد القدوس وسينما كنا بنضحك في السينما وتصرخ كمان".
وضع الفن في مصر وأهمية الإعلام
وتابع: "وضع الفن دلوقتِ لا يليق بمكانة مصر، هل أنت يهمك الإعلام في مصر ولا يهمك إعلام مصر خارج مصر؟ يهمك الاتنين يعني لازم كمان يهمك إن الإعلام يصل للعالم كله، يصل مشوه ولا يصل ان اللي يستقبله يثق فيه ويسمعه؟، يثقف فيه وعنده رسالة والفن كذلك".
أهمية جودة الإنتاج الفني وتأثيره
وواصل: "أنت بتعمل أعمال هتسافر برة وهتلف العالم وناس كتير هتشوفها، واللي كان بيحصل في مصر حوالي 30 إلى 40 سنة، كان الفنان اللي في الوطن العربي إذا ما دخلش مصر وقدم فنه عمره ما يبقى نجم، عايزين نحافظ على دي ونقدم فن يفيد ويرفع قيمة الإنسان، أنت عارف كيف تكتب الكوميديا لإن لها أصول، لازم المؤلف يرجع تاني".
محمد صبحي يحذر من تدهور الإنتاج الفني
وأضاف: "احنا مبقاش عندنا دلوقتِ أسامة أنور عكاشة ولا يوسف إدريس ولا نجيب محفوظ ولا العظماء، علشان أنت كبلد مقعد العظماء والمحترمين واللي بيفهموا وبيكتبوا واثبتوا جدارتهم ونجوم سواء ممثلين أو مؤلفين أو مخرجين قاعدين في بيوتهم ليه علشان دمهم تقيل، أنا راجل مبخافش وبنتقد وضع سائد كل الناس بتتكلم عليه في السوشيال ميديا، بقول دوروا على الناس دول وقولوا لهم تعالوا من فضلكم اشتغلوا إنما بنت تطلع في التيك توك بتقول كلام سافل ومنحط بتشتغل في 3 و4 مسلسلات، فيه شركة إنتاج في مصر هي عايزة التريند والكاميرات ما بتروحش غير للتفاهات زي خناقة طلاق، إنما فلان ده عالم تخرج من جامعة عين شمس وعمل اختراع محدش يعبره ولا يبص له".
محمد صبحي والقضية الفلسطينية
وأشار الفنان محمد صبحي إلى أن "عملية طوفان الأقصى في 7 أكتوبر كانت بمنزلة الحجر الذي حرك المياه الراكدة".
مصير القضية الفلسطينية بعد كامب ديفيد
وأضاف خلال لقائه ببرنامج "نظرة" الذي يقدمه الإعلامي حمدي رزق بقناة "صدى البلد": "أنت بتقول لي خليك عاقل إسرائيل معتدية واحتلت أرضك عايزينك نحلها قالوا نحله، واتعمل مؤتمرات واجتماعات كتير واتفاقيات وكامب ديفيد وغيرها، للأسف مفيش حاجة اتحققت".
دور الدول العربية في دعم القضية الفلسطينية
وتابع محمد صبحي: "ايه اللي حصل قبل 7 أكتوبر قال لك لا دولتين ولا نقبل بدولة فلسطينية، مين اللي اتكلم عايز أعرف دولة قالت أنا ضد إسرائيل لأنها بتتخلى عن كل الاتفاقيات اللي تمت مفيش، يا إخواننا الكيان الصهيوني بقى له 75 سنة وأنت لسه قاعد النهارده بعد 75 سنة بتقول إمتى بقى الدولتين من فضلك".
معاناة الفلسطينيين والرد العربي
وأضاف: "هو أنت مش من حقك كشعب مصر تقدر تدين الناس اللي ماتت دفاعًا عن هذا الوطن وهما بيحاربوا الإنجليز، للأسف أنت دلوقتِ هتدينهم وتقول الإنجليز ذنبهم إيه زي ما أنت بتدين الفلسطينيين دلوقتِ!! مين اللي دافع عن فلسطين واتقال إن إسرائيل دولة غاشمة ومحتلة وغاصبة وأنا قاطع علاقتي معاها لغاية لما تعود حقوق الفلسطينيين؟ فيه حد قال كده؟ مفيش، أنا بتكلم عن دول مش مشاعر شعبية، ده حصل تطبيع بعد 7 أكتوبر، احنا مش هنقعد نسكت حصل تطبيع من دول عربية مع إسرائيل بعد المجازر اللي حصلت ضد الشعب الفلسطيني".
دعوة محمد صبحي للحكام العرب
وواصل: "أنا عايز حد يقول لي رئيس دولة عربية كذا وقف وقال لا تعامل مع إسرائيل إلا ما تعود حقوق الفلسطينيين، قال لك لأ أصل حماس دي زي الإخوان ودول إرهابيين، وصفوهم إرهابيين، بينما دي مش قضيتك النهارده أنت مالك، أنا لما أقاوم الإرهابيين الإخوان في مصر دي وضع بلدي إنما أنا مالي بحماس أنا أدافع عن الأبرياء الفلسطينيين، ألم تؤلمكم ضياع الأرض 75 سنة؟ ولم يؤلمكم المجازر البشعة غير المبررة ضد الشعب الفلسطيني".
تهجير الفلسطينيين ونبوءة سيناء
وأكمل: "وبعدين عايز يهجر الفلسطينيين ويدخلهم سيناء علشان هو إيمانه إن سيناء بتاعته ولو كانت مصر وقالت دول إخواتنا وغزة دول أهالينا وهندخلهم مؤقت سيناء كنت ممكن أنتحر فيها لإني مش هعرف أعمل حاجة بس خلاص اتحققت النبوءة وما حدش يقول لي بقى نظرية المؤامرة".
غياب المظاهرات العربية الداعمة لفلسطين
ووجه محمد صبحي سؤالاً لحمدي رزق، قائلًا: "طبعًا سنك أكد لي إنك عشت محمد الدرة، لما حصل اللي حصل مع محمد الدرة كان 240 مليون عربي في الشوارع بالوطن العربي مش بيهدوا بلادهم ولكن بيناصروا فلسطين مش نسكت علشان نبقى مع إسرائيل، قول ليا مظاهرة واحدة زي مظاهرة قامت في أمريكا من شباب أمريكا اتضربوا واتسحلوا في الشوارع علشان بيدافعوا عن فلسطين و4 جامعات اتقفلت والشباب عايزين يقفلوا الجامعات علشان بتمول الكيان الصهيوني، أنت عندك مظاهرات في الوطن العربي؟ أنت شُفت ناس نزلت تؤيد زي أيام محمد الدرة؟ قُل لي أي بلد عربي سمعت التأييد المرعب من دول أوروبا لأمريكا لإسرائيل وقالت أنا عايزة بس أقول كلمة حق لفلسطين؟ يا أستاذ حمدي الشعوب تلمس الشعوب مش الحكومات، الشعب الفلسطيني لمس إيه وطلعوا وقالوا احنا مش عايزين منكم حاجة ولا عايزين منكم أكل فقط اقفوا معانا".
اقرأ أيضًا:
الفنان محمد صبحي يتصدر محركات البحث برسالة مؤثرة للراحلة سعاد نصر
