بكره أدخل مستشفيات وركبتي مكنتش قادرة منها.. أبرز تصريحات شيماء سيف مع ياسمين عز
حلت الفنانة شيماء سيف أمس ضيفة في برنامج "كلام الناس" مع الإعلامية ياسمين عز، وفاجأت الجمهور خلال اللقاء بخساراتها 50 كيلو جرامًا من وزنها، وكشفت عن الأسباب التي دفعتها لذلك، وغيرها من الأمور التي نرصدها لكم في السطور التالية.
تصريحات شيماء سيف
قالت الفنانة شيماء سيف أن السبب الذي دفعها لإجراء عملية تكميم المعدة بسبب أن وزنها بدأ يؤثر بالسلب على صحتها، وأنها بالرغم من كونها صاحبة مقولة "ليه أعمل ريجيم"، لكنها وقتها كانت بصحة جيدة، مُضيفة:"أنا عاملة نيولوك، وعملت العملية بتاعة تكميم المعدة، وخدت القرار، بالرغم من أني صاحبة مقولة ليه أعمل ريجيم وقدامي مكرونة بشاميل وشيكولاتة، ولكن كنت بقول كدا عشان صحتي كانت كويسة".
وأكدت شيماء سيف على أنها عانت كثيرًا بسبب السمنة، حيث أثرت على رجلها، ولم تكن تستطيع صعود السلم، مُعلقة:" لكن فجأة ودون سابق إنذار رجلي وجعتني، وركبتي مكنتش قادرة منها، ومش عارفة أعمل إيه، وأطلع السلم وأصرخ، وكان عندي وجع فظيع، وكلمت دكتور قالي لازم أعمل أشعة، ولما بعتهاله، قالي إحنا لازم نعمل تغيير مفصل حالًا".
وحكت شيماء سيف على دعم زملائها النجمة يسرا، والفنانة مي كساب لها في تلك الأزمة، مُضيفة:"وأنا بكره أدخل مستشفيات، وانهرت وجالي اكتئاب وأنا بصور، وعنيا كانت بتدمع من كُتر ما كنت زعلانة، ويسرا وقفت التصوير وقالتلي مالك روحت قولتلها، وقالتلي نروح لدكتور تاني، وروحلته قالي إني مش محتاجة أعمل عملية، ولكن انتي محتاجة تخسي، ومي كساب اللي شجعتني وقالتلي متقلقيش يا شيماء ويلا ولازم نعملها، وفعلًا خدت الخطوة وخسيت 50 كيلو".
وأوضحت شيماء سيف على أنها فقدت 20 كيلو جرامًا بعد العملية، وحكت عن نجاح تلك العملية، قائلة:"بتخسي تدريجي بس أول فترة بتزلي 20 كيلو فجأة بعد العملية وبعد كده بتنزلي كل شهر 6 كيلو ودي حاجة مفرحة جدًا وبتقعدي تبصي على الميزان وتقولي ده أنا، ونزلت لحد دلوقتي 50 كيلو وراضية عن شكلي جدًا وكان نفسي أوقف على كده وأكتر حاجة مبسوطة منها بعد العملية إني بقيت بركع وأنا بصلي، وكنت بصلي على كرسي زي الناس الكبار ومبقتش مصدقة نفسي، ودي حاجة حلوة أوي وحاجة صحية ويارب إن شاء الله يديم علينا كلنا الصحة، وأنا شاكلي اللي بره ده مش فارق لي في أي حاجة، ولا كان فارق لي في الأول ولا دلوقتي وأنا كان فارق لي في الأول أني كويسة وسليمة ودلوقتي، ولما خضت التجربة دي اخدت مميزات أكتر بقيت خفيفة، وبتفرج على نفسي في الفيديوهات القديمة بتخض وزمان ماكنتش بشوف نفسي كده، وكنت بشوف نفسي زمان قمر ".
كما تحدثت أيضًا عن الأشياء التي تزعجها في الرجال، وهي أنهم يعطون لأنفسهم حجم أكبر من حجمهم الطبيعي، مُضيفة:" الراجل عموما مضايقني وجوده في الحياة والراجل مدي لنفسه حجم أكبر من حجمه، وليه انا أبقى مركزة أوي وبعمل ألف حاجة وأنا هات ده وانت جاي وكلم الراجل أكد عليه يقولي لأ، وسيبك اني ممثلة مصرية انا جاية انهاردة اشوف أخرك ايه، والراجل شخصية محدودة رحم الله امرء عرف قدر نفسه، يبقى تعيش على هذا المبدأ وبما إني نحلة وشغالة طول اليوم عاوزاك تيجي اخر يوم تقولي كتر خيرك يا حبيبتي مش عايزة غيرها".
سبب خلافها مع هنا الزاهد
كما كشفت أيضًا عن سبب خلافها مع الفنانة هنا الزاهد الذي دام لمدة 8 سنوات، وأن الخلاف حدث بسبب منشورًا كتبته هنا الزاهد في البداية، شعرت أنها تلقح بالكلام عليها، مُعلقة:"أقسم بالله أنا عارفة أن الناس مش هتصدقني، أنا أبسط وأتفه في الخناقات من ما أنتم متخيلين، والمشكلة كانت مع صاحبتي وكنا رايحين مع بعض عزاء وحصل مشكلة بسيطة أوي وقتها وكل واحدة راحت لوحدها، وهي كتبت منشورًا حسيت إنه في تلقيح عليّ، علشان كده لقحت عليها، أنا نشرت على السوشيال ميديا ولقحت عليها على الملأ، علشان تشوفها هي وأختها، ومؤخرًا اتصالحنا، ومفيش أي مشكلة بيننا".
اقرأ أيضًا:
شيماء سيف تعلن عن خضوعها لعملية تكميم معدة بسبب أزمة صحية
بعد تصدرها التريند.. حكاية حب شيماء سيف وزوجها بدأت بـ مكرونة بشاميل
