رفضت المشاركة في جعفر العمدة.. أبرز تصريحات طارق الدسوقي
كشف الفنان طارق الدسوقي، عن تفاصيل بدايته الفنية، وأعماله الفنية الجديدة وسر حبه الكبير للأعمال الدينية والتاريخية، موضحًا أنها تتطلب مواصفات خاصة، وسبب غيابه عن الساحة الفنية طوال العشر سنوات الماضية.
تصريحات طارق الدسوقي
وقال طارق الدسوقي، في لقائه مع الإعلامية إنجي هشام، في برنامج "المنسي" المذاع عبر شاشة قناة "هي": بدايتي كانت، من خلال أعمال محترمة تخاطب عقول الناس، ومكنتش أملك القدرة وقتها على الاختيار، ولكن كان توفيق من ربنا، ولما بقى عندي القدرة على الاختيار مشيت على نفس المعايير الجادة وعملت 80 مسلسل تلفزيوني، و15 مسلسل سينمائي و15 عمل مسرحي، والعديد من الأعمال الإذاعية، والحمد لله مفيش فيهم عمل واحد يتقال عليه تافه أو سطحي أو مبتذل، وده أنا حريص عليه لغاية النهاردة.
وتابع: أنا بستمتع بالأعمال الدينية والتاريخية والوطنية، خاصة أني أجيد اللغة العربية ولها جرس موسيقي في أذني، والأعمال دي بتتطلب مواصفات خاصة من الممثل ومش أي ممثل يقدر يجيد النوعية دي من الأعمال، لأنه لازم يجيد اللغة العربية ومخارج الحروف سليمة إلى حد كبير، ويكون عنده صبر ويجيد ركوب الخيل واستخدام السلاح.
وأضاف: إحنا في أمس الحاجة للأعمال التاريخية والدينية، واستدعاء سيرتهم العطرة وتقديمها في أعمال دلوقتي يصلحوا يكونوا قدوة للشباب.
سر غياب طارق الدسوقي عن الأعمال الفنية
وقال طارق الدسوقي أنه يغيب عن الدراما والسينما بسبب أنه يضع لنفسه معايير جادة، وصارمة جدًا في اختيار أعمالي، والفترة من 2011 لـ 2016 معظم الأعمال اللي كانت بتتقدم لا تمثل هويتنا ولا قيمتنا ولا ثقافتنا ولا منظومة الأخلاق اللي بتميزنا، ولما الدنيا بدأت تتصلح لقيت أن معظم المنتجين والمخرجين اللي موجودين دلوقتي أنا معرفهمش ومبيجهدوش نفسهم يدوروا وبياخدوا اللي قدامهم.
وتابع طارق الدسوقي: مجموعة كبيرة من الكتاب والمخرجين فاهمين الموضوع غلط، وأن الإخراج هو الإبهار في الصورة واستخدام تكنيك حديث، وأن أنا أشد الناس بأي شكل، ونفس الكلام في ورش الكتابة دلوقتي، ومبقاش في ارتقاء بلغة الحوار، وده بيأثر على اختيارهم للممثلين.
وأضاف: بقى في استسهال وكله عايز يخلص تصوير بسرعة، ومعظم الأعمال دلوقتي بتتصور قبل رمضان بشهرين تلاتة وبيجيبوا وحدة تصوير تانية ومخرج تاني ويقعدوا 24 ساعة في الاستوديو.
سر رفض طارق الدسوقي المشاركة في مسلسل جعفر العمدة
وقال طارق الدسوقي اتعرض عليا مسلسل جعفر العمدة ورفضته لأن في مدرسة دلوقتي عند كتير من المخرجين، اساميهم كبيرة، وكل سنة ليهم مسلسل وبيكسر الدنيا، لكن محمد سامي وجهة نظره ومدرسته أنهم بيعملوا الفن لتسلية الناس، ومحدش يتكلم عن الرسائل والأهداف، والفن أبسط من كده كتير.
ووأضاف: أن حد يتوه وحد يموت قبل ما نعرف السر دي خلطة بسيطة جدًا والأفلام الهندي قامت على كل ده من زمان، أعمل كل ده لكن حط قضية نناقشها.
واستكمل: أنا معنديش مشكلة اشتغل مع محمد سامي، ومحمد رمضان، ولكن المهم نكون هنقول إيه، ومحمد سامي قال في البروفا أنه بيسلي الناس ويقعدهم قدام الشاشة، وهو زكي وبيعرف يعمل ده، وأنا مش ممكن أعمل عمل فيه قيمة إيجابية واحدة، وفي لجان إلكترونية على السوشيال ميديا وبتشتم اللي بينتقد.
طارق الدسوقي يكشف علاقته بأبنائه
وأكد الفنان طارق الدسوقي، أنه رفض التوسط لأولاده لدخول الوسط الفني: المفروض النقابة عليها دور كبير اوي في تقليل الفجوة بين الجيل القديم والجديد، وميكونش دورها متوقف بس على المرض والجنازات، المفروض ترتقي بمستوى المهنة، والمفروض تهتم بثقافة الفنانين والأعضاء بتوعها ويكون في صالون ثقافي أسبوعي أو شهري.
وتابع: أشرف زكي دفعتي وإحنا أصدقاء جدًا ومكناش بنفترق لا ليل ولا نهار، هل هو مش عارف أن طارق بعيد عن الشاشة؟ ده جيله والمفروض هو اللي يبادر ويسأل أنت بعيد بمزاجك؟، أنت قيمة وقامة وواجهة مشرفة إزاي مش متواجد، وطب أنت محتاج حاجة أو مريض؟ ده دور النقابة.
وأضاف: رفضت أتوسط لولادي علشان يدخلوا التمثيل، والفن مافيهوش واسطة ولا يمكن تصنع نجم والحكم للجمهور، وأحمد ابني مشي في الطريق بشكل صح هو خريج كلية الإعلام، وبياخد ورش تمثيل، وأنا مبتدخلش أني أكلم له مخرج أو منتج، وعلى الرغم من أنه جان وفيه كل مواصفات النجم ولكن سايبه يتعب زي ما أنا تعبت.
طارق الدسوقي يتكلم عن اعتزاله الفن
وأردف: أنا لو مش مقتنع برسالة الفن كنت أعلنت اعتزالي، ما أنا بعيد بقالي 10 سنين وخلاص الجاي مش قد اللي رايح، بس أنا لايمكن أعمل كده، المهنة دي أنا قعدت 40 سنة فيها وعملت فيها رسالتي على أكمل وجه.
كما كشف تفاصيل تعاونه مع الفنانة شادية: الأستاذ أشرف فهمي المخرج، كان هيضربني وكان عنده حق لأنه كان تصوير فينال فيلم لا تسألني من أنا، وكان فيه كل الأبطال فوق السطح والدنيا برد جدًا، وأنا إتأخرت في الامتحان وقال لما يجي قولولي، وطبعًا مدام شادية لما جيت حجزت وقالت له لو لمسته أنا همشي الولد عنده امتحان هيعمل إيه.
تحدث الفنان طارق الدسوقي، عن تجربة زواجه مرتين، مؤكدًا أنه حافظ على علاقته بـ ابنائه بالرغم من الانفصال عن امهاتهم، كما أنه لن يقدم على خطوة الزواج مرة أخرى:" أنا علاقتي كويسة مع طليقاتي الاتنين وأهم حاجة أن ولادي الأربعة بيحبوا بعض جدًا، وأنا أب زي ما الكتاب بيقول، وأنا موجود معاهم في كل حاجة في الدنيا بشكل أساسي، والأولاد مالهمش علاقة بالزوجة والزوجة، هما عايزين بابا وماما، والمفروض ميتحملوش تبيعات الطلاق.
اقرأ أيضًا:
طارق الدسوقي يكشف سر اعتذاره عن المشاركة في مسلسل ”جعفر العمدة” مع محمد رمضان
