”عشرتي صعبة ومش أي حد يقدر يعيش معايا في مكان واحد“.. أبرز تصريحات شريف مدكور

تصدر اسم الإعلامي شريف مدكور، تريند جوجل، وذلك بعد عرض حلقته في برنامج ع المسرح، مع الإعلامية منى عبد الوهاب، وبعد كشفه عن تفاصيل حياته الشخصية والمهنية، وفي السطور التالية نرصد أبرز تصريحاته.

تصريحات شريف مدكور

وأكد شريف مدكور على أنه يعشق المسرح، قائلاً:"لو تخيلت حياتى مسرحية هيبقى اسمها شارع شريف؛ لأن الشارع بتلاقي فيه كل حاجة فيه المدرسة والمخبز والجامع، وكل الأوقات بحبها وبحب كل يوم بيومه وبعيش كل لحظة، وبشعر أن كل أيام ربنا حلوة".

وأكد شريف مدكور على أنه شخص متفائل، وأنه في طفولته كان هادئًا، مُتابعًا:" بحب كل حاجة تكون إيجابية، وبتجنب المر، وكنت طفل هادى ومؤدب جدا وخايب فى المدرسة والأخير على الفصل، والمدرسات كانوا بيحبوني، وعشت طفولة حلوة أحسد نفسي عليها بسبب أمي وأبويا وجدودي".

شريف مدكور يكشف عن الصفات التي اكتسبها من جده الفريق محمد فوزي

وأشار شريف مدكور أنه يعتبر نفسه محظوظًا لكونه رأى كل أجداده، وأنه أكتسب من جده الفريق محمد فوزي، الدقة والاهتمام بالتفاصيل، مُعلقًا:"كنت محظوظ إني شفت كل جدودي وتربيت في خيرهم وحضنهم، وجدي الفريق محمد فوزي كان له النصيب الأكبر، وكان في عمله قوي وصارم وعسكري من الدرجة الأولى، وفي بيته عكس ذلك ومعايا أنا كان الأمر مختلف، وكان شايلنا وهو بيضحك فأنا أول حفيد عنده توفى وأنا عندى 29 سنة وكان مستمتع بهدوئي، وأخدت من طباعه الدقة والاهتمام بالتفاصيل والإلتزام واحترام الآخر وثقافته، وكان بسيط".

وكشف الإعلامى شريف مدكور، عن سبب فشله في الارتباط والحب، وذلك لأن طباعه صعبة، ولا أحد يقدر على التأقلم معها، قائلًا:" ارتباطاتي دائماً بتبوظ بعدما يكتشفوا إني سي السيد، ووالدي مكنش كده، وأنا عشرتي صعبة ومش أي حد يقدر يعيش معايا في مكان واحد مدة طويلة بسبب النظام والانضباط والنظافة المفرطة، وعندى وسواس فى موضوع النظافة والنظام والترتيب ولا أقبل الهرجلة فى البيت".

ولفت شريف مدكور إلى أنه يتعمد إظهار نفسه بوجه طفولي في برنامجه؛ لأنه برنامج ترفيهي يقدم للأسرة المصرية، مُوضحًا:" اللي بيطلع على الشاشة يطلع بوجه طفولي فيه شوية براءة لأن البرنامج ترفيهى للأسرة المصرية، وأنا في حياتي هادي مش برقص واتنطط، وبعمل ده في البرنامج عشان دا أكل عيشي".

وأكد شريف مدكور أن حب التجارة يجري في دمه، مُتابعًا:"لما متحققش حلمى فى الجامعة الأمريكية وكلية فنون جميلة أخذت ثمن السيارة وفتحت مصنع، وده تفكير تجارى وأبويا كان تاجر وكنت بروح معاه الشغل وكان يستورد هدوم والتجارة كانت بتجرى فى دمى، مضيفا، دخلت كلية تجارة فشعرت بالإحباط فاخدت ثمن عربية كان هيشتريهالى والدى فعملت بها مشروع لتصنيع ملابس البنات فى الأزهر وما تبقى اشتريت بيه سيارة صغيرة، وبعدها بعام اشتريت شقة وعربية".

شريف مدكور: أصبحت مذيعًا بالصدفة

وأوضح شريف مدكور أنه عمل مذيعًا عن طريق الصدفة، مُوضحًا:"كنت معدًا بقناة النيل للأسرة وأصبحت مذيعًا بالصدفة وكانت صدفة حلوة وعمري ما كنت متخيل أطلع قدام الكاميرا وأكون جرىء وحبيت اللي بعمله وبموت في شغلى ومستمع بالبرنامج والمشاهدين".

وشدد شريف مدكور، على أنه يحب تخطي أي معوقات تقابله، قائلاً :"بحب أوصل وأدوس على أى معوقات أو مطبات زى القطر وماشى فى سكتى ماليش دعوة بحد، لافتا انا صاحب الفضل على نفسى وانا بحب نفسى جدا وبحب شريف مدكور جدا وأخرج وأسافر مع نفسي، ووالدي ووالدتي وعيلتي وأصحابي أحب الناس ليا".

اقرأ أيضًا:

شريف مدكور يعلق على ازمة هيدى كرم بطريقته الخاصة

شريف مدكور :ريهام سعيد أوهمتني إنها معجبة بيا وعرضت عليها الزواج وضحكت عليا