”نفسي أخد الجنسية المصرية“.. أبرز تصريحات مجد القاسم في برنامج المنسي

قال الفنان مجد القاسم، أنه يتمنى أن يحصل على الجنسية المصرية، مُضيفاً:"نفسي أخد الجنسية المصرية، أنا لازم أخدها لأن بقالي 33 سنة في مصر، ومصر الروح، وربنا كريم وإن شاء الله أخدأخدها".

وكشف مجد القاسم خلال لقائه مع الإعلامية إنجي هشام، في برنامج "المنسي"، عن سبب اختفاء فنانين التسعينات، مُعلقاً:" أنا بعتبر جيل التسعينات مع أنه أكتر جيل أثر بعد جيل العظماء، الفترة بتاعتهم كانت قليلة وبدأ موضوع الانترنت وسرقة الأغاني وفجأة انقرضت شركات الإنتاج، وبقى موضوع الإنتاج صعب على الفنان والموضوع مكلف جدًا علشان حد يعمل ألبوم بـ مليون جنيه ولا مليون ونص".

وأكد مجد القاسم على أن أم كلثوم هي المطربة الوحيدة التي تستحق لقب صوت مصر، مُعلقاً:" صوت مصر أم كلثوم ومينفعش حد ياخد اللقب بعدها، وهي صوت مصر وصوت العرب، ومسلسل السيرة الذاتية بتاعها أحسن عمل عن سيرة ذاتية لفنان، والناس كانت بتقفل المحلات وقت عرض المسلسل، ومفيش مسلسل سيرة ذاتية نجح قد مسلسل أم كلثوم".

وأوضح مجد القاسم أنه عرض عليه المشاركة في مسلسل ذئاب الجبل، لكنه رفض العمل به، قائلاً:" اتعرض عليا مسلسل ذئاب الجبل ورفضته وبعدين ندمت، كنت عايز أعمل مسلسل فريد الأطرش وكل ما نوصل للاتفاق وهنبدأ نصور يحصل حاجة ومتمش العمل، وخسرت فرص بسببه".

وكشف مجد القاسم عن رأيه في أغاني المهرجانات، مؤكداً على أنه لا يحبها، لأنه تربى على أغاني عبد الوهاب، وأم كلثوم، مُعلقاً:" أنا مبحبش المهرجان لأني تربيت على عبد الوهاب وأم كلثوم ومقدرش أسمعه، والله يبارك لمصطفى كامل وجوده في النقابة حجم الموضوع شوية، وطبعًا بسمع راب لأنه في موضوع بيتقال ويناقش مشكلة معينة مع أن اللي بيقوله مش مغني، ولكن في موضوع محترم، المهرجانات كلمات بذيئة ومش عارف إزاي للناس".

وعن حقيقة الخلاف بينه وبين الفنانة أصالة، فعلق:" كان في تشابه في كلمات أغنية نكتة بايخة كنت منزل قبلها أغنية طبعًا مش نفس الموضوع، ومكنش في خلاف في الأصل بينا، أنا مقولتش عنه ولاقيت الصحافة اللي كتب عنه".

كما تحدث الفنان مجد القاسم، عن فترة ابتعاده من الساحة الفنية وترحيله من مصر بسبب اتجاهات اخيه فيصل السياسية،مُوضحاً:" الفترة دي كانت صعبة، لأني كنت في عز نجوميتي ونجاحي ومكسر الدنيا، وكنت القاسم المشترك في كل حفلة في مصر والوطن العربي، وفجأة يتقفل عليا في كل الوطن العربي لأني أخو فيصل القاسم، طيب أنا فنان ومش بوافقه في اتجاهاته، ولكن كل ده علشان أنا أخوه، وطبعًا مُنعت من الحفلات والتليفزيون في مصر والوطن العربي واترحلت، لغاية ما رجعوني تاني".

وأكد على أن علاقته بشقيقها توترت، قائلاً:" علاقتي بـ أخويا اتوتر ولكن هيعمل إيه ده شغله وله محطات، ولكن علاقتنا رجعت كويسة ده أخويا الكبير وتاج راسي، ولكن بعدين كل الأمور اتغيرت، وأنا عانيت من الموضوع ده حتى بعد عز نجاحي بـ 5 سنين، ومكنتش بطلع في حفلات وكله كان خايف يذيع ليا في التليفزيون".

وتابع:" رجعت بعد 3 شهور ومش عارف أعمل إيه، وخايف والأبواب مقفولة كلها إلا الأفراح وأنا كنت رقم واحد، ويوم ما رجعت اشتغلت أفراح، وكنت ممنوع من التلفزيون، وبدأت أعمل ألبوم سنة 2000 وحطيت في دماغي أني هعمل 12 أغنية مفيش فيهم أغنية تقع، ولو معملتش كده بعد الوقفة دي كلها مش هتقوملي قومة تاني، وعملت 11 أغنية مكنش فيهم غلطة وكلهم نجحوا، والمنتج قالي إحنا نزلنا مليون شريط في السوق، وكسرت الدنيا".

إقرأ أيضا

مجد القاسم وسلمي عادل يشعلان أقوى السهرات الرمضانية بحفل كامل العدد (صور)