مؤامرة كبيرة.. فيفي عبده تكشف سر غيابها عن الدراما
علقت الفنانة فيفي عبده علي شائعات إهانة المخرجين في أعمالها الفنية، وذلك أثناء تواجدها كضيفة على الإعلامية فاطمة مصطفى فى حلقة جديدة من حلقات الراديو بيضحك على إذاعة 9090.
غياب فيفي عبده عن الساحة الفنية
وقالت فيفي عبده أنها تعرضت للكثير من المؤامرات، وذلك بسبب نجاحها الكبير، سواء علي مستوي الدراما او المسرح أو حتى الرقص الشرقي، خلال الفترة الماضية.
وأكدت فيفي عبده أن هناك بعض الأشخاص حاولوا إبعادها عن الوسط الفني والأعمال الفنية خلال فترة توهجها فى الدراما، مضيفة أنهم كانوا يرددون أنها داخل لوكيشن التصوير تقوم بإهانة المخرجين، وهو ما نفته تمامًا، وأثبتت عكس كلامها، بعد نجاح مسلسل كيد النسا وتعاونها مع المخرج الكبير أحمد صقر والذي يعتبر واحد من أهم مخرجي الدراما، علي حد كلامها.
فيفي عبده تتمني تقديم عمل مسرحي جديد
وكشفت فيفي عبده عن رغبتها في تقديم عمل مسرحي خلال الفترة القادمة، وسبب رفضها الكثير من الأدوار، الغير مناسبة لها.
وتحدثت فيفي عبده عن حبها للفنان محمد رمضان، وأكدت أنه فنان مميز، مشيرة أنها تابعت مسلسل جعفر العمدة في رمضان الماضي، مشيرة إن، ربنا منحه نجاحات كبيرة، متابعة أنها قدمت 15 مسرحية في مسيرتها، ولم يتم تصوير سوى 3 مسرحيات منها.
وعبرت النجمة فيفي عبده، عن غضبها من ذكر كلمة الراقصة علي انها إساءة للمرأة، مؤكدة أن الراقصة ليست مرأة سيئة السمعة، وأن هناك العديد من الراقصات لهن جمهورهن الذي يحترمهن جدا.
فيفي عبده ذهبت للعمرة والحج 5 مرات
وأكدت أنها عملت عمرة وحجيت 5 مرات وقالت:"عملت فرض ربنا، كفاياكم تقولوا الرقاصة، هو مفيش شماعة مايلة غير، الرقاصة؟ لأ الرقاصة دي معاها ناسها اللي بيحترموها، وبيتفرجوا عليها، قرفونا وزهقنا من كلمة رقاصة كلمة مالهاش لازمة.
وعبرت فيفي عبده، أيضا عن غضبها بسبب السؤال المتكرر عن عدد أزواجها، وتفاصيل حياتها الشخصية قائلة: بيسألني على الهواء، اتجوزتي كام مرة؟ ما خلاص خلصنا يا أخي، مش حلو أبدًا ودي حاجة سخيفة أوي، حياتي الخاصة مالكش دعوة بيها ولا تسألني فيها أبدا".
واكملت حديثها: "كلمني على شغلي، والحاجة اللي افتخر بيها زي ولادي، مفيش أسئلة جديدة خالص، والموضوع بقى سخيف أوي".
فيفي عبده: الرقص زمان كان ليه هيبة
وقالت فيفي عبده عن رأيها في الجيل الحالي من الراقصات: الجيل الحالي بعافية شوية، والرقص زمان كان ليه هيبته وقيمته، واللي كان بيتفرج كان له تقله مش زي دلوقتي ودلوقتي الرقاصة، بالزمبالك كأنها لعبة وبيقلدوا بعض، أنا كسرت الدنيا بالجلابية، ولما كنت فقيرة مكنتش بقدر أشتري بدلة أرقص بيها، ولما ربنا إداني جبت 5 مصميين أزياء واشتريت بدل رقص.
وتحدثت فيفي عبده عن تعرضها للحسد وقالت: "من قر الناس، القرآن لما باجي أقراه بيقف في بوقي، والخرز الأزرق مش لاقياه اللي كنت بلبسه، ومحدش كان بيلبس أزرق زيي وأنا مرة كنت على المسرح عندي أغنية بتقول دق الكزبرة، وأنا على المسرح بغنيها راح الهون اتكسر نصين، وقولتلهم ليه كدا".
المنتج الذي سحر فيفي عبده
واكدت فيفي عبده أنها لا تعرف المنتج الذي أدعى أنه عمل لها سحر وقالت: دا كلام فاضي معرفوش، ورديت على كلامه بطلوعي للجمهور وللناس، ودا كلام فارغ، وحد يقول الكلام دا بردو، والميديا مش كل حاجة فيها صح، في كدب كتير أوي ومكنتش أعرف كدا.
اقرأ أيضًا:
فيفي عبده: الراقصة مش سيئة السمعة وأنا حجيت 5 مرات والراقصات دلوقتي بزمبلك
