سوسن بدر: أرفض عمليات التجميل واتبع نظام غذائى للحفاظ على صحتى

عبرت الفنانة سوسن بدر عن رفضها فكرة الخضوع لعمليات تجميل، حيث أنها لا تحب تغيير شكلها وممتنة بالخطوط الموجودة في وجهها مشيرة إلى أنها لن تحصل على دور فتاة جامعية أو في المرحلة الثانوية لذا لا تحتاج أن تبدو أصغر عمرا.

سوسن بدر وعمليات التجميل

وقالت سوسن بدر خلال لقاء تلفزيوني لها : "أنا دلوقتي بقيت كده وزي ما الناس قبلتني زمان وحبوني، هيحبوني دلوقتي وأنا كده ويحبوني بعدين وأنا أكتر من كده، والخطوط اللي عندي في وشي أنا بحبها جدا، أحط حقنه في وشي ليه؟ أنا مش ضد ده كل واحد حر يعمل اللي يبسطه أنا اللي باسطني أني محافظة على حواديت عمري في وشي".

وتابعت سوسن بدر: "أنا مش هيتعرض عليا دور بنت في الجامعة ولا ثانوي هيجلي دور مناسب لسني وشكلي زي ما أنا كده واللي عايز يعمل يعمل، كل واحد يعمل اللي يبسطه".

سوسن بدر تكشف الوصفة السحرية للحفاظ على رشاقتها

وكشفت عن الوصفة السحرية التى تتبعها للحفاظ على قوام رشيق، سواء باتباع نظام غذائي مناسب، أو ممارسة أنواع معينة من الرياضة.

وقالت: "أنا مش حارمة نفسي من حاجة، لإني لو حرمت نفسي ممكن أنفجر في الأكل مرة وحدة، أنا أكلي مرتين في اليوم، فطار كويس جدا، وآخر وجبة مع الغروب كإني في رمضان، وآكل كل حاجة لكن الحلويات على طرف الشوكة لو نفسي في حتة بسبوسة".

وتابعت: "مقدرش آكل فاكهة كتير لأنه سكرها يسبب الجوع أكثر، لكن ممكن أضيفها على السلطة".

سوسن بدر وممارسة الرياضة

وردا على سؤال حول ممارستها الرياضة، قالت سوسن بدر: "طول عمري ممارسة جادة للرياضة، ويوميا لازم ساعتين في الجيم، لغاية ما حصل كسر في رجلي، والأطباء محبذين حفاظي على المشي والسباحة".

مسلسل "قلع الحجر" رمضان 2024

يذكر أن سوسن بدر تستعد لخوض موسم دراما رمضان 2024 من خلال مشاركتها في بطولة مسلسل "قلع الحجر".

وتضم قائمة الفنانين المشاركين في مسلسل "قلع الحجر"، كلا من سوسن بدر، منى عبد الغني، محمد رياض، عبد العزيز مخيون، يوسف إسماعيل، منة فضالي، والعمل إخراج حسني صالح.