محمد رضوان يكشف كواليس شخصية رمضان حريقة
تحدث الفنان محمد رضوان عن كواليس ترشيحه لشخصية "رمضان حريقة" في مسلسل "موضوع عائلي" وقال أنه تم ترشيحه للشخصية بالصدفة.
قال محمد رضوان خلال لقاء تلفزيوني له: "دوري في موضوع عائلي هو طبطبة من ربنا عليا، كان في ممثل تاني كان هيعمله بس اختلف معاهم في وجهات النظر أو على الأجر مش عارف"
وتابع: "لقيت المخرج أحمد الجندي طالب يقابلني وانا مكنتش قابلته قبل كدة وقعدنا نتكلم كتير في مواضيع مختلفة ورأيه في الحاجات اللي شافهالي ورأي في الحاجات اللي أنا شوفتهاله ووجهات نظرنا في الكوميديا وفي الآخر قالي خلاص هتعمل معايا الدور"
وأضاف: "هو بيعمل حاجة جميلة وهي أننا بنقرى المشاهد وبنعمل بروفات الترابيزة جوة الديكور اللي هنصور فيه فبنبقى تعايشنا مع مكان التصوير".
وعن كواليس العمل مع أبطال المسلسل قال: "وسماء ابراهيم من أول لحظة كنت مصدق أنها زينب مراتي والولاد ولادي ودة بيتنا ووأحمد الجندي من الناس السهلة وحتى لو الشخصية مفيش حوار ليها في مشهد يقولي مش مشكلة اتكلم وماجد الكدواني معندوش مشكلة في أن شخصية تضحك في المسلسل هو ممثل بيعمل دوره وملوش دعوة بغيره وكل حاجة كانت ماشية تبع الأصول والأعراف الفنية المحترمة"
وأضاف: "الناس كانوا شايفين أن موضوع عائلي ايقونة وانا شايفة فاتحة الخير عليا في كل حاجة والكل بقى بيطلبني في شغل معاهم علشان بقيت محبوب"
وأختتم حديثه قائلا: "حاسس اني لسة ممثلتش وعندي مشاريع كتيرة عايز اعملها وأدوار نفسي امثلها"
يذكر أن محمد رضوان شارك في مسلسل "موضوع عائلي" مع ماجد الكدواني، رنا رئيس، طه دسوقي، سماء إبراهيم، محمد شاهين وغيرهم نخبة من النجوم. المسلسل من تأليف وإخراج أحمد الجندي.
