مأساة عمر: ”عمي وأولاده رموني في الشارع بعد وفاة أهلي ومش عارف أروح فين“

شهدت منطقة حدائق القبة واقعة مأساوية حزينه لشاب بعد وفاة أهله، وتشريده في الشارع من أهل والده بسبب الميراث، بالإضافة إلى عدم اهتمام والدته التي يحلم بأن يعيش معها.

عمر مشرد حدائق القبة: مليش مكان غير الشارع

قال عمر الشاب الذي شرده أهله في الشوارع بسبب الميراث لـ "الموجز": "كنت عايش مع جدي والد ابويا بعد وفاة والدي، ومحستش اني يتيم الأب والأم غير بعد موت جدي اتبهدلت اوووي، جدي كان مدلعني وانا كنت أقرب حد ليه، وطلباتي كلها أوامر واللي نفسي فيه كله بيجي، وجدي مش بيبخل عليا بحاجه لكن بعد ما جدي مات اتشردت واتبهدلت جامد من عمي وأولاده، وكل ده بسبب الورث وطلعني بره البيت وقالي مالكش حاجه عندنا ولا عايز حتى يديني اوضه اعيش فيها واصرف على نفسي وانا مش عارف أروح فين".

واستكمل عمر حديثه قائلا : "أهل والدي كلهم تدخلوا عشان يحلوا ما بينا، بس عمي رافض أي كلام من أعمامي أو اخواته البنات وطردهم، وقال محدش يجيلي هنا تاني وهددني إنه مش هيسبني في حالي، وأنا عامل محضر علشان خايف ومش عارف أعمل إيه، حاولت اتكلم معاه ونحل بالتفاهم هو رافض وقالي مالكش حاجه عندي، أنا نفسي بس اقعد ولو في اوضه بدل قعدة الشارع بعد ما كنت قاعد في بيت كبير ، في الآخر اقعد في الشارع ،عايز اعرف أكل واشتغل 24 ساعه علشان اصرف علي نفسي، يرضي مين ده هو يقبل علي أولاده كده".

عمر: نفسي أعيش في اوضه بدل مرمطة الشارع

وأضاف عمر لـ "الموجز" : "أنا كان ليا حساب في البنك بمبلغ حوالي 70 ألف وانا اخدت منهم 5 آلاف، ولما سألت باقي فلوسي فين اتبهدلت واضربت انا كنت بضرب على طول في الصح والغلط من غير تفاهم، زي ما يكون عمي ما بيصدق يضربني، انا اتبهدلت اوي من بعد موت جدي كان هو ابويا التاني عمي لما عرف ان بصور مع الإعلام والصحافة هددني، انه لو شافني مش هسيبني في حالي، وانا خفت منه وعملتلوا محضر وانا مش عايز غير حقي" .

وانهى عمر حديثه قائلا : "انا روحت لوالدتي اعيش معاها وهي رفضت وقالتلي أنا مليش أولاد روح مكان ما جيت عند أهل ابوك، أنا زمان دورت عليك وهما قالو مالكيش عيال عندنا ، قولتلها انا عايز اعيش معاكي يا أمي قالتلي ماليش عيال انا ابني مات، غصب عني قولتلها أنا زمان لما سألت عليكي قالو أمك ماتت وانتي دلوقتي موتي يا أمي فعلا، عايز اقولها سامحيني طلعت مني غصب عني وتعالى يا أمي نرجع نعيش مع بعض محتاجلك اوووي".

إقرأ أيضا

قرار عاجل بشأن محاكمة خلية حدائق القبة
محافظ القاهرة يتابع رفع أنقاض العقار المنهار بحدائق القبة