جدعنته أودت بحياته.. بالفيديو أسرة شاب الشروق تروي تفاصيل العثور عليه مقتولا بالشارع
حادث شاب الشروق.. في مدينة الشروق، وفي صباح يوم استيقظ الجميع للعمل، ومن بينهم الشاب حسن صاحب 22 عاما من عمره بطل حادث شاب الشروق، خرج كعادته للسعى جاهدًا لإعالة أسرته وتحقيق أحلامهم المتواضعة، كانت عيونه المتلألئة تعكس الأمل، وكان قلبه النقي ينبض بالرغبة في مد يد العون لمن هم في حاجة.
في إحدى الأيام، صادف حسن رجلاً يدعى إسلام، كان يبدو مرهقًا ومحتاجًا لفرصة عمل، لم يتردد حسن في مد يد العون له، فقد شعر بأنه يشاركه نفس الصعوبات والأحزان، وقرر حسن أن يشغل إسلام معه حتي يوفر لقمة العيش من خلال تروسيكله الصغير.
شاب الشروق يدفع حياته ثمن الشهامة والجدعنة
كانت شهامة وجدعنة حسن، سبب في رجوعه جثة هامدة وجسد يحمل آثار إصابات وسحجات، ولمعرفة الأسباب والتفاصيل الواقعة ذهبت محررة "الموجز" لمنزل أهل المجني عليه للحديث معهم، ومن أقوالهم أشارت أصابع الاتهام إلى إسلام، الصديق الذي قرر حسن مساعدته، ولم يدري حسن أن الشيطان يكمن داخل إسلام، وأن الخيانة والعنف ستتربص له.
الموجز يلتقي بأسرة شاب الشروق
عندما التقت محررة "الموجز" بأهل المجني عليه "حسن"، انهمرت الدموع من عينيهم، وتحدث والد حسن وكانت كلماته تنبع من قلب مجروح، قائلا: "حسن كان رمز للأمل في حياتنا، كان بيشتغل يومياً عشان يساعدني ويساعد أخواته البنات اللي علي وش جواز، حسن كان سندي وعصاي في الحياة الصعبة، مش قادرين نتخيل اننا هنعيش من غيره".
والد قتيل الشروق يستعيد ذكريات قبل الحادث
وبينما كان والد حسن يتحدث، انتابته ذكريات مريرة تعود إلى أيام قبل الحادث المروع، وأكد: "قبل ثلاثة أيام من الحادث، حسن قالي أنه تعرف على شاب بيدور على شغل، وأن الحياة صعبة ومش عارف يجيب فلوس يصرف بيها علي عائلته، "قالي انا ساعدته وقولتله نشتغل مع بعض علي التروسيكل ورزقي ورزقك علي الله، مقدرتش أقوله حاجه عشان كان دايما بيحب يساعد المحتاج".
واستكمل والد حسن: في يوم تأخر حسن عن البيت وده مش من عادته، كنا قاعدين قلقانين ومحدش عرف يوصله، رنيت عليه المكالمة اتفتحت ومحدش رد، بعديها لقيت رئيس مباحث بيكلمني بيقولي مين بيشتغل مع حسن وهل معاه تروسيكل، مقدرتش اتلم على أعصابي بعد ماسمعت السؤال، واتأكدت ان في حاجه حصلت".
وتابع: خرجت من البيت مش شايف قدامي، واما روحت القسم محدش عرفني ابني فين، سألت رئيس المباحث" فين حسن طمن قلبي عليه"، قالي" عاوزين بيانات اللي بيشتغل معه"، لكن مقاليش أنه مات عشان الصدمة.
تفاصيل مقتل شاب الشروق
وتابع: نزلت من المباحث ومعرفش حسن ابني فين، لحد ما قبلت واحد داخل القسم قالي البقاء الله، فقدت الوعي ومحستش بحاجه بعديها، بعد اما فوقت قابلت شاهد علي واقعة قتل ابني، وقالي" حسن كان قاعد معايا بيشرب شاي، وبعديها لقينا حد سايق التروسيكل وبيجري بيه، حسن جري وراه ومسك التروسكيل، وكان بيتسحل معاه لحد ماصدمه بالرصيف ووقع مات".
وتابع والد حسن: "كنت دايما بقوله اتجوز وفرحني بيك، ماكنش عايز يتشِغل بغيرنا ويبعد عننا، كنت جبتله عروسة بس حبيبي ملحقش يتهني في حياته اللي كانت دايما شقي وتعب عليه".
واختتم: بطالب من المسؤولين أن حق ابني يرجع، لأنه اتقتل غدر وكان جدع وطوب الأرض بيحبه، وجنازته كانت زفة عريس والكل حضرها".
وذكرت شقيقة حسن: "كان دايما بيحس بالمحتاج وكان بيبيع البضايع بأقل من المحلات عشان اللي معهوش يجيب"، وتابعت والدموع في عينيها، "كل ماقعد زعلانه كان دايما بيجي يتكلم معايا ومايسبنيش غير اما أضحك، في يوم فرحي كان زعلان ان همشي وهسيب البيت، مكنش بيسيب حد قاعد لوحده غير اما نقعد مع بعض، كانت روحه حلوه وبيحب الخير للكل.
واختتمت: أخويا مش مرتاح في طربته، وبيجيلي في الأحلام تعبان وبيغمي عليه، اطالب بحق أخويا يرجع حتي يبقي عبره للمتسولين".
اقرأ أيضا:
استخبى في الدولاب.. أقوال مجري التحريات في واقعة مقتل شاب على يد زوجته وعشيقها بالبدرشين
